Hans Egedep ernera niuertoq Niels Rasch Egede niueqatigiinnit (Handelskompagniet) suliakkiissut naapertorlugu niuertoruseqarfik Egedesminde Attup kujataatungaani Eqalussuarni 1759-mi pilersippaa. Angunni atsiullugu Egedesmindemik atserlugu. Hollandimiut arfanniartartuisa Kalaallinik paarlaateqatigiittarnerat taamaatinniarlugu niuertoruseqarfik pilersinneqarpoq. 1761-mi Niels Egede J.P. Dorfimit (1718-1787) paarlanneqarpoq.

Eqalussuarni niuerniarneq ajornakusoorsimammat, J.P. Dorfi Handelskompagniemit qinnuigineqarpoq nunamik allamik ujaasissasoq. 1763-imi J.P. Dorfi aqutsisuulluni Jens Schmidt aamma Adam Thorning ilagalugit niuertoruseqarfik qeqertamut Aasiannut nuuppaat. Aasiaat qeqertaata tungaa piniarfiginnera, imeqarnera kiisalu umiarsualiviginnera pissutigalugit ilisimalluarneqareerpoq. Hollandimiut arfanniartartuisa Jesse Bayimik taaguuteqartippaat, qallunaat niuertoruseqarfiup aqqa attatiinnaraat.

Kalaallit nioqqutaai pisiarineqartarsimapput, Europamiullu nioqqutaai tuniniarneqartarsimallutik. 1774-mi Handelskompagniet imminut akilersinnaajunnaarmat, KGH-p niuerneq akisussaaffigilerpaat. Niuerneq Kalaallit Nunaata avannaatungaanit Qeqertarsuup Tunuatungaanut isumagineqartarsimavoq. Puisit teriannissallu amii, mattaat, soqqaat kiisalu mitit qiviui nioqqutigineqartarsimallutik.

Inissisimalluarneq pissutaasunut ilaalluni Kalaallit kuisimasut amerliartorsimapput. Kristumiunngorsaaneq atuarfeqalersitsinerlu ajoqersuisunit anguniagarineqarsimavoq. 1768-mi Hans Hansen Tulle Aasianni siullerpaalluni ajoqersuisunngorpoq. Inuit nutserartarnerat pissutaasunut ilaalluni Kristumiunngorsaaneq aallaqqaammut iluatsilluarsimanngilaq. Nappaassuaq tunillaassortoq pissutaaqataalluni. 1793-mi inuit 64-iusimapput, taakkunannga tallimat kuisimasuunatik. Meeqqat atuarfiat 1914-mi pilersinneqarpoq. 1928-mi nukappiaqqat atuarfiat pilersinneqarpoq, 1933-milu arnat atuarfiat avannaani siullerpaalluni pilersinneqarluni.