1960-kkut naalerneranni katersugaasivimmik pilersitsinissaq kissaatigineqalersimavoq. Iluamik eqqartorneqartarsimagaluarpoq, aatsaalli kingusinnerusukkut suliarineqalersimavoq. Aallaqqaammut Arfanniat naalagaata illutoqaa piukkunneqaqqaarsimavoq. Illu 1770-kkunni napparneqartoq 1982 kingorna iluarsaanneqassasoq Ministereqarfimmit aalajangerneqarpoq. Taamatut aalajangerneq pilersaarut siumut naatsorsuussaq malittarineqarpoq. Ukiuni 1974-imiit 1978-imut Aasiaat Kommuneanut sanaartornermi aningaasaliissutaasussaq. 1973-imi illup siunissaa Kommunalbestyrelsemit ataatsimiissutigineqarmat siulittaasoq Ado Lyngep oqaatigaa, illu katersugaasivissatut mikivallaartoq. Hendrik Johansenillu oqaatigaa, pilersitsisoqarniarpat ukiut qulit sinnerlugit utaqqisariaqaratik. Katersugaatissat ikinneruleraluttuinnassammata, pissarsiniarnerlu ajornarsissammat. Hendrik Johansenip siunnersuutigaa, Frederik Lyngep illukua iluatsillugu pisiarineqaannassanersoq.

B-26: Arfanniat naalagaata illutoqaa. Aasianni illuni nutaannginnersaaq.

1978-imi novembari naalersoq aallakaatitsivikkut nalunaarutigineqarpoq Aasiaat Katersugaasiviat siullermeerluni ammassasoq. Katersugaasivik decembarip pingajuanni 1978 Folketingimut ilaasortaasimasup Frederik Lyngep illukuani oqaluffiup eqqaaniittumi ammarneqarpoq. Ilaqutariit Johansenikkut umiaat ukiut 100-t sinnerlugit pisoqaassusilik kiisalu Esaias Jeremiassenip qajaa saaqqutaalu 1930-kkunninngaanneersut pissarsiarineqarsinnaasimapput. 1986 aasaagaa Namminersornerullutik Oqartussanit maleruagassat tunngavigalugit Atuartitsinermut kultureqarnermullu immikkoortoqarfimmut naalagaaffik katersugaasivimmut tapiissuteqartalerpoq. 1988-imi Aasiaat Katersugaasiviat ukiunik qulinngortorsiormat Peter Siegstadiugaluaq pillugu saqqummersitaq alutorsartitsisimavoq.

B-404: Frederik Lyngep illukua 1932-mi napparneqartoq, 1974-imilu nutarterneqartoq. Aasiaat Katersugaasivigisimasaa ukiuni 1978-imiit 2001-imut.

Ukioq 2002 katersugaasivimmut alloriarfiusimavoq. Niuertup illutoqaanut nutsernissaq aggustip arfineq pingajuanni nalunaarutigineqarpoq, nutsernerlu septembarimi piviusunngortinneqarluni. Nutsinnginnermi illutaa iluarsaanneqarpoq. Frederik Lyngep illukua ulloq manna tikillugu toqqorsivittut atorneqarpoq.

B-24: Aasiaat Katersugaasiviat. 1963-i tikillugu niuertut najugarisarsimasaat.